विराटनगर । स्कुल बसले ठक्कर दिँदा मोरङको रंगेलीमा एक बालकको मृत्यु भएको छ भने अर्की एक बालिका गम्भीर घाइते भएकी छन् ।
रंगेली नगरपालिका–७ स्थित माउण्टेन मकालु बोर्डिङ स्कुलको १ क ११३० नम्बरको बसले सोही बोर्डिङमा अध्ययनरत दुई बालबालिकालाई दिउँसो ४ बजेतिर ठक्कर दिएको हो ।
बसको ठक्करबाट नर्सरीमा अध्ययनरत रंगेली–५ का महादेव मण्डलका छोरा अन्दाजी ४ वर्षीय रितिक मण्डलको मृत्यु भएको मोरङ प्रहरीले जनाएको छ ।
बसको ठक्करबाट एलकेजीमा पढ्ने रंगेली–६ का नरेश मण्डलकी छोरी अन्दाजी ६ वर्षीया सुनमकुमारी मण्डल गम्भीर घाइते भएको र उनलाई थप उपचारका लागि विराटनगर पुर्याइएको छ ।
बोर्डिङ छुट्टि भएपछि घरतर्फ जाँदै गरेका बालबालिकालाई बोर्डिङअगाडि नै बसले पछाडिबाट ठक्कर दिएको प्रहरीको प्रारम्भिक अनुसन्धानबाट खुलेको छ ।
दुर्घटनापछि बसलाई प्रहरीले नियन्त्रणमा लिएको छ ।
प्रतिक्रिया दिनुहोस
Copyright © 2019 / 2024 - Kalapanimedia.com All rights reserved
