काठमाडौं । चितवन, पर्सा, कास्की, रुपन्देहीलगायतका ठाउँमा ठूलो वर्षा भएकाले सतर्कता अपनाउन बाढी पूर्वानुमान महाशाखाले आग्रह गरेको छ ।
महाशाखाले बुधबार राति सूचना निकालेर चितवनको शक्तिखोर, माडी क्षेत्रको छर्छरे, कल्याणपुर, बनकट्टा, गोविन्दबस्ती र आसपासका क्षेत्रमा पछिल्लो ३ घण्टामा ठूलो वर्षा भएकाले बाढी र डुबानको जोखिम रहेको जनाएको हो ।
ठूलो वर्षाका कारण त्यस क्षेत्र आसपास भइ बहने रिउखोला र अन्य खहरे खोलामा बाढी आउन सक्ने भएकाले नदी तटीय क्षेत्रमा बाढी र डुबानको जोखिम भएका ठाउँमा सतर्कता अपनाउन सूचनामा भनिएको छ ।
यस्तै, पर्साको ठोरी, मकवानपुरको हेटौँडा, नवलपरासी, रुपन्देही, कास्की र आसपासका क्षेत्रमा पनि ठूलो वर्षा भएको र यी क्षेत्रमा फेरि पनि ठूलो पानी पर्ने सम्भावना रहेको भन्दै सतर्कता अपनाउन आग्रह गरिएको छ ।
यी क्षेत्र भइ बहने साना नदीमा आकस्मिक बाढीको सम्भावना रहेकाले बिहान १० बजेसम्म नै सतर्कता अपनाउन अनुरोध गरिएको छ ।
आज पनि देशका धेरै ठाउँमा पानी पर्ने सम्भावना रहेको मौसमविद्ले बताएका छन् । आज प्रदेश(१, मधेस प्रदेश, लुम्बिनी प्रदेश र वाग्मती प्रदेशका केही ठाउँमा ठूलो पानी पर्ने मौसमविद्ले बताएका छन् ।
यसैबीच, पानी परिरहेकाले गाडी चलाउँदा सावधानी अपनाउन प्रहरीले आग्रह गरेको छ । सडकका खाल्डाखुल्डीमा पानी जमेको हुन सक्ने र सडक चिप्लो हुने हुँदा दुर्घटनाको जोखिम रहेकाले गाडी चलाउँदा सावधानी अपनाउन प्रहरीले अनुरोध गरेको हो ।
प्रतिक्रिया दिनुहोस
Copyright © 2019 / 2024 - Kalapanimedia.com All rights reserved
