काठमाडौं । नेपाली कांग्रेसका नेता डा. शेखर कोइरालाले देशमा सुशासन नरहेको टिप्पणी गरेका छन् ।
बिहीबार काठमाडौंमा डा. दीपकप्रकाश बास्कोटाद्वारा लिखित ‘निष्ठाको यात्रा’ नामक कृतिको लोकार्पण एवं वैदिक नेपालको भविष्य नामक समारोहमा कोइरालाले देशलाई श्रीलंका बन्नबाट रोक्न दण्डहीनता अन्त्य गर्नु जरुरी रहेको बताए ।
‘यसैगरी घिचघिच गरेर देश चलाउने हो भने हामी कहीँको रहँदैनौँ । देश कता पुग्छ, कसरी जान्छ भन्ने हामी सबैलाई चिन्ता छ,’ कोइरालाले भने, ‘श्रीलंका नबनोस् भन्नका लागि दण्डहीनताको अन्त्य गर्नुपर्ने जरुरी छ । भ्रष्टाचार निर्मुल गर्नुपर्ने जरुरी छ । सुशासन दिन सक्नुपर्छ । यो देशमा सुशान छँदै छैन भने पनि हुन्छ ।’
नैतिकता नहुनेहरूले राजनीति गर्न नहुने उनको भनाइ थियो । ‘राजनीति गर्ने व्यक्तिहरूमा र जो प्रजातन्त्रवादी हुन्छ, त्यसमा नैतिकता भएन भने फेरि राजनीति नगरे हुन्छ । नैतिकताको धेरै अंश राजनीति गर्ने व्यक्तिहरूमा हुनैपर्छ,’ उनले भने ।
अहिलेका नेताहरू जनताबाट धेरै टाढा भइसकेको कोइरालाले बताए । राजनीति गर्नेहरूले जनतासँग जोडिन आवश्यक रहेको उनको भनाइ थियो । जनतासँग जोडिन कन्जुस्याईं गर्दा जनताले राजनीतिको फाइदा लिन नसक्ने कोइरालाको भनाइ थियो ।
प्रतिक्रिया दिनुहोस
Copyright © 2019 / 2024 - Kalapanimedia.com All rights reserved
