पदाधिकारी टुंगो लगाउँदै माओवादी केन्द्रः महासचिव बन्लान् त देव गुरुङ ?

काठमाडौं । पदाधिकारी टुंगो लगाउन हम्मेहम्मे परेको नेकपा माओवादी केन्द्रमा पद बाडाफाँडको समस्या देखिदै आएको छ ।

पटक पटक बस्दै स्थगित भएको स्थायी कमिटी बैठक आज पनि बस्दैछ र पदाधिकारी टंग्याउने बताएको छ ।

माओवादी प्रवक्ता कृष्णबहादुर महराका अनुसार केन्द्रीय कमिटी, पोलिटब्यूरो, स्थायी कमिटी र पदाधिकारीको टुंगो लगाउने तयारी छ ।

यसअघि बिहीबार डाकिएको बैठक अन्तिम समयमा आएर बस्दै नबसी स्थगित भएको थियो । माओवादी बैठक बुधबार पनि बसेको थियो ।

माओवादीको आठौं महाधिवेशन सात महिना अघि भएको थियो । तर, महासचिवमा सहमति नहुँदा पदाधिकारीको टुंगो लाग्न सकेको छैन ।

यस अघि महासचिवमा बर्षामान पुन र जनार्दन शर्माको दाबेदारी रहेको भएपनि अध्यक्ष प्रचण्डले देव गुरुङलाई महासचिव बनाउने तयारी गरेको बुझिएको छ ।

पुन र शर्माले आआफ्नो दाबेदारी नाछोडेपछि प्रचण्डले दुवैलाई महासचिव नबनाउने भएका हुन् । अब पुन र शर्मालाई उपमहासचिव बनाइने चर्चा रहेको छ । त्यस्तै गिरिराजमणि पोखरेललाई पनि उपमहासचिव बनाइने भएको छ ।

त्यसैगरी माओवादी केन्द्रले वरिष्ठ उपाध्यक्षमा नारायणकाजी श्रेष्ठ र उपाध्यक्षमा कृष्णबहादुर महरालाई यस अघि नै चयन गरिसकेको छ भने अब पम्फा भुसाल, दिनानाथ शर्मा, हरिबोल गजुरेल र गणेश शाहलाई उपाध्यक्ष बनाउने तयारी रहेको छ ।

माओवादीको विधानअनुसार एक अध्यक्षसहित, एक वरिष्ठ उपाध्यक्ष, ६ उपाध्यक्ष, एक महासचिव, दुई उपमहासचिव, तीन सचिव र एक कोषाध्यक्ष गरी १५ सदस्यीय पदाधिकारी रहने व्यवस्था रहेको छ ।