तस्बिर : रासस
दार्चुला । दार्चुलामा बाढी र पहिरोमा परि पाँच जनाको ज्यान गएको छ, तीन जना बेपत्ता भएक छन् । नौगाड गाउँपालिका र महाकाली नगरपालिकामा आएको बाढीमा परि पाँच जनाको ज्यान गएको जिल्ला प्रहरी कार्यालय दार्चुलाका प्रहरी सहायक निरीक्षक लोकेन्द्रबहादुर चन्दले जानकारी दिए ।
नौगाड गाउँपालिकाका जानकी ठगुन्ना, धनुली ठगुन्ना, मोहनराम पार्की, महाकाली नगरपालिका वडा नम्बर १ की मानमती कार्की र महाकाली नगरपालिका वडा नम्बर २ का नन्दराम बोहोराको ज्यान गएको हो । नन्दरामको बाढीमा परि ज्यान गएको हो भने बाँकी चार जनाको पहिरोका कारण ज्यान गएको चन्दले जानकारी दिनुभयो । बाढीमा परि अझै तीन जना बेपत्ता भएका छन् । बेपत्ता भएकाहरूको खोजी भइरहेको उहाँले बताउनुभयो । यस्तै तीन जना गम्भीर घाइते छन् । उनीहरूलाई उपचारका लागि सुर्खेतबाट हेलिकप्टर मगाइएको छ ।
दार्चुलामा शुक्रवार रातिदेखिको लगातारको वर्षापछि आएको बाढी, पहिरोका कारण १२ वटा घर बगाएको छ । जोखिम क्षेत्रका मानिसहरूलाई सुरक्षित ठाउँमा सारिएको छ । बाढीले दर्जनौँ घर बगाउनुका साथै लास्को खोलाको झोलुङ्गे पुल पनि बगाएको छ । जिल्ला प्रहरी कार्यालय दार्चुलाका अनुसार रातिदेखि अहिलेसम्म उद्धार कार्य भइरहेकाले क्षतिको पूरै विवरण प्राप्त हुन बाँकी रहेको छ ।
त्यस्तै महाकाली नगरपालिका ३ मा रोकेर राखेका सात वटा गाडीसमेत लास्को खोलाले बगाएको छ । लगातारको वर्षाले दार्चुला–तिङ्कर सडकमा पर्ने लास्कुखोलामाथिको झोलुङ्गे र मोटर पुलसमेत बगाएको छ । बिहानदेखि पानी पर्न छोडे पनि नदीले अझै कटान गरिरहेको छ । जिल्ला प्रशासन कार्यालय दार्चुलाले सबैलाई सुरक्षित स्थानमा बस्न आग्रह गरेको छ ।
यता, दोधारा चादनी नगरपालिका ३ बडुवाल टोल का रङलाल बादी लाई पनि जोगबुडा नदिले बगाएको खबर प्राप्त भएको छ ।
प्रतिक्रिया दिनुहोस
Copyright © 2019 / 2024 - Kalapanimedia.com All rights reserved
