कालीकोट । कालीकोटमा लोपोन्मुख रैथाने बाली संरक्षण गर्न किसान जुटेका छन् । रैथाने बालीको माग बढ्न थालेपछि उनीहरु संरक्षणमा जुटेका हुन् ।
जिल्लामा पाइने रैथाने बाली चिनु, कागुनु, फापर, कोदो, जौलगायतका बाली अहिले लोपोन्मुख अवस्थामा छ । पछिल्लो समय यसको माग बढेपछि संरक्षण अभियानमा किसान जुटेका छन् ।
झण्डै दुई दशक पहिले जिल्लामा उल्लेख्य रूपमा ती बाली उत्पादन हुने गर्दथ्यो । यसवर्ष एक रोपनी जग्गामा चिनुखेती गरेको खाँडाचक्र नगरपालिका– ११ स्थानीय जीवन गिरीले जानकारी दिए। परीक्षणका रूपमा यो वर्ष एक रोपनी जग्गामा खेती गरिएको उनको भनाइ छ । स्थानीय सरकारले पनि रैथाने बाली संरक्षणका लागि पहल थालेको छ ।
लोपोन्मुख रैथाने बाली संरक्षणका लागि नगरले आफ्ना नीति तथा कार्यक्रममै समेटेको तिलागुफा नगरपालिकाका मेयर शङ्करप्रसाद उपाध्यायले बताए। नगरभित्र उत्पादित रैथाने बाली नगरले नै खरिद गरी बजारीकरण गर्ने उनले बताए।
रैथाने बाली संरक्षणका लागि गाउँपालिकाले पनि विभिन्न कार्यक्रम सुरु गरेको पलाँता गाउँपालिकाका अध्यक्ष विष्णुबहादुर रोकायाले जानकारी दिए । पलाँता क्षेत्रमा कोदो, चिनु, कागुनु, फापर, सिमी र आलु उत्पादन हुने र यी बालीलाई अब जिल्ला बाहिर निर्यात गर्ने तयारी भइरहेको उनले जानकारी दिए।
प्रतिक्रिया दिनुहोस
Copyright © 2019 / 2026 - Kalapanimedia.com All rights reserved
