सुदूरपश्चिममा घर बिक्रिको कागज थमाउदै सरकारी आवास सुविधा लिदै यी सांसद

धनगढी । सुदूरपश्चिम प्रदेशसभा सदस्य मालामती रानाले प्रदेश राजधानीमै घर भएर पनि आवास सुविधा लिएको भन्दै आलोचना भएपछि २०७५ को फागुनदेखि प्रदेशसभाबाट आवास सुविधा बापतको रकम लिइनन् ।

प्रदेशसभाका पदाधिकारी तथा सदस्यहरुको सेवासुविधा सम्बन्धी ऐन २०७५ अनुसार प्रदेश राजधानीमा घर भएका पदाधिकारी तथा सदस्यलाई आवास सुविधा नदिइने व्यवस्था छ । उक्त व्यवस्था विपरीत आवास सुविधा लिएकी रानाले आलोचनापछि २०७५ फागुनमा आवास सुविधा बापतको रकम नलिएकी हुन् । तर प्रदेशसभा सचिवालयदेखि करीब डेढ किलोमिटरको दूरीमा पर्ने धनगढी उपमहानगरपालिका–८ मा घर हुँदाहुँदै पनि रानाले फेरी आवास सुविधा लिन थालेको पाइएको छ ।

आवास सुविधा नलिएका बेला वार्षिक ३५ हजार रुपैयाँ एकमुष्ट आवास मर्मत शिर्षकमा प्रदेशसभा सचिवालयले रानालाई उपलब्ध गराउदै आएको छ । रानाले आर्थिक वर्ष २०७६/७७ को साउनदेखि भने प्रदेशसभा सचिवालयमा धनगढीमा आफ्नो घर नभएको देखाउदै आवास सुविधा बापत मासिक १७ हजार रुपैयाँ लिने गरेको पाइएको छ ।

यसअघि एकाघर परिवारको सदस्यको नाममा रहेको घर अर्कै व्यक्तिको नाममा राजीनामा गरेको कागजपत्र पेश गरेर रानाले आवास सुविधा बापतको रकम लिइरहेकी हुन् । धनगढीमा घर हुँदाहुँदै पनि आवास सुविधा लिइरहेको विषयमा रानाले कानूनअनुसार नै सेवासुविधा लिइरहेको दाबी गरिन् ।

विगतमा मर्मत सम्भार खर्च लिने गरेकोमा एकाएक घर बिक्रि गर्नुको कारण बारे जिज्ञाशा राख्दा भेटेरै कुराकानी गर्ने भन्दै उनले फोन काटिदिइन् । राना जनता समाजवादी पार्टी सुदूरपश्चिम संसदीय दलकी नेता हुन् ।