२५ गते शुक्रबार बसन्तपुरमा राप्रपाले चुनावी सभा गर्दै, आज एकैदिन ६ वटा सभाको आयोजना

राष्ट्रिय प्रजातन्त्र पार्टी ९राप्रपा० ले काठमाडौंको बसन्तपुरमा उपत्यका स्तरीय चुनावी सभा गर्ने भएको छ। भोली शुक्रबार हुने उक्त सभालाई अध्यक्ष राजेन्द्र लिङ्देन र पार्टीका वरिष्ठ नेताहरुले सम्बोधन गर्ने कार्यक्रम रहेको राप्रपा प्रचार विभागले जनाएको हो। आमसभामा उपत्यकाका तीन जिल्लाका १५ प्रतिनिधि सभाका उमेदवार र ३० प्रदेश सभाका उमेदवारहरुले मतदानका लागि सामुहिक अपिल गर्ने कार्यक्रम रहेको विभागले जनाएको छ। देशका १ सय ४२ प्रतिनिधिसभा र २ सय ८६ प्रदेश सभा क्षेत्रमा उमेदवारी दिएको राप्रपा सबैभन्दा बढी उमेदवार उठाउने एमाले पछिको दोस्रो दल हो।

राप्रपाले यसअघि गोरखाको पालुङटार, नवलपुरको डण्डा, नवलपरासीको सुनवल र पाल्ही नन्दनमा चुनावी सभा गरिसकेको छ।

राप्रपाले कार्तिक २४ गते एकैदिन ६ वटा सभा आयोजना गरेको छ। अध्यक्ष लिङ्देन र पूर्व अध्यक्ष पशुपतिशमशेर जबराले सिन्धुपाल्चोक, सिन्धुली, सिराहा, मकवानपुर, उदयपुर र सुनसरीको धरानमा हुने सभालाई सम्बोधन गर्ने कार्यक्रम तय भएको राप्रपा प्रचार विभागले जनाएको छ। आज बिहिबार विहान १०: ०० बजे सिन्धुपाल्चोकको मेलम्ची, हेलम्बू बसपार्कमा सभा हुनेछ भने सिन्धुलीको दुधौली बजारमा हुने सभामा दिउँसो ११:३० बजे अध्यक्ष लिंदेन पुग्ने कार्यक्रम छ ।

आजै उदयपुरको बेल्टार बसपार्कमा दिउँसो १:०० बजे, मकवानपुरको फापरबारीमा दिउँसो २:३० बजे र सिराहाको धनगढी महेन्द्रनगर, जिरो माईलमा दिउँसो ३:४५ बजे हुने सभालाई अध्यक्ष लिङ्देनले सम्बोधन गर्नेछन् ।