विराटनगर । दुई गठबन्धनका उम्मेदवारलाई पाखा लगाएर मोरङको प्रतिनिधिसभा क्षेत्र ५ बाट स्वतन्त्र उम्मेदवारी दिएका नेकपा एमालेका बागी योगेन्द्र मण्डल निर्वाचित भएका छन्।
सत्तारुढ पाँचदलीय गठबन्धनका तर्फबाट नेकपा माओवादी केन्द्रका उम्मेदवार शिवकुमार मण्डल र एमाले गठबन्धनका तर्फबाट जसपा राजकुमार यादवलाई पछि पार्दै योगेन्द्र विजयी बनेका हुन्।
निर्वाचन आयोगका अनुसार योगेन्द्रले २१ हजार ८२० मत प्राप्त गर्दा माओवादीका शिवकुमारले १७ हजार ४८६ मत प्राप्त गरे भने जसपाका राजकुमार यादवले १७ हजार ३९० मत पाएका छन्।
अघिल्लो निर्वाचनमा काँग्रेसका अमृत अर्याललाई हराउँदै विजयी बनेका माओवादी केन्द्रका नेता मण्डल ०७० मा देउवा नेतृत्वको सरकारमा माओवादी केन्द्रको तर्फबाट आपूर्तिमन्त्री बनेका थिए।
यता स्वतन्त्र उम्मेदवारी दिएका योगेन्द्र भने विद्यार्थीकालको राजनीतिमा मात्र निर्वाचनमा जितेको अनुभव रहेको बताए। संसदीय निर्वाचनको पहिलो अनुभव रहेको बताउने उनले मतगणनाको शुरुवातदेखि नै अग्रता कायम राखेका थिए।
नेकपा एमालेको प्रदेश कमिटी सदस्यसमेत रहेका योगेन्द्र पछिल्लो ५ वर्षदेखि सो क्षेत्रमा प्रतिनिधिसभाको उम्मेदवार बन्ने तयारीमा रहे पनि अन्तिम समयमा एमाले र जसपाको गठबन्धन हुँदा जसपाको भागमा क्षेत्र ५ परेर उनलाई पार्टीले टिकट दिएन। उनले पार्टीसँग असन्तुष्टि जनाउँदै स्वतन्त्र उम्मेदवारी दिएका थिए।
प्रतिक्रिया दिनुहोस
Copyright © 2019 / 2024 - Kalapanimedia.com All rights reserved
