कोरोनाको त्रास वीरगंज नाका सुनसान

आयातमा गिरावट

आरोहण शाह, वीरगंज । वीरगंज भन्सार नाकाबाट विभिन्न मालसामानको पैठारीमा गिरावट आएको छ। कोरोना भाइरसको त्रास र होलीका कारण सातादेखि भन्सार नाकाबाट भित्रिने मालवस्तुको संख्यामा निकै गिरावट आएको भन्सार अधिकारीहरुको अनुमान छ।

वीरगंज भन्सारको तथ्यांक अनुसार फागुन २९ र ३० गते जम्मा १३ करोड रुपैयाँ राजस्व असुली भएको छ भने २८ गते १९ करोड ८१ लाख, २७ गते ३ लाख, २६ गते ९ करोड ७१ लाख रुपैयाँसहित महिनाभरी ४२ अर्ब रुपैयाँको हाराहारीमा राजस्व असुली भएको छ।

वीरगंज भन्सार र्यालयका अनुसार पहिलेको तुलनामा मालसामान बोकेका सवारी साधनमा आंशिक रुपमा कमी आएको तर आगामी सोमवारदेखि वृद्धि हुने अनुमान गरिएको छ।

‘निकासी कम देखिएको छ, १२ महिनाको लागि १ खर्ब ८८ अर्ब वीरगंज भन्सारले लक्ष्य पाएकोमा अहिले करीब १ खर्बको हाराहारीमा राजस्व असुली भइसकेको कार्यालायको भनाइ छ । भन्सार कार्यलयका अनुसार ‘यो लक्ष्यको ७२ प्रतिशत हो। तर, कोरोनाले गर्दा आगामी दुई महिना निकै कम राजस्व उठ्ने विश्लेषण गरिदैछ।’

होलीकारण पनि आयातकर्ता, व्यवसायी, क्लियरिङ एजेन्ट, सवारी चालकलगायत बिदामा घर गएकोले जति सामान छुट्नु पर्ने हो त्यति नछुटेको हुन सक्ने वताइएको छ। मुख्यतया भारत, चीन, मलेशिया, थाइल्यान्ड, अमेरिका, क्यानडालगायत मुलुकबाट मालवस्तुहरु वीरगंज नाका हुँदै भित्रिने गरेको छ।

पानीजहाजबाट कोलकाता र विशाखापट्टनम वा भारतको अन्य प्रान्तबाट मालवस्तु बोकेको ट्रकहरु पनि वीरगंज नाका हुँदै नेपाल भित्रिन्छ। होली अगाडि दैनिक ६/७ सय गाडीहरु आउँथ्यो भने अहिले सयभन्दा पनि कम गाडी आएको वीरगंज भन्सारले जनाएको छ।

यसैगरी वीरगंज भन्सारको सीमावर्ती रक्सौल भन्सारको पनि अवस्था उस्तै छ। होली यता मालवस्तु र सर्वसाधारणको आवागमनमा पनि कमी आएको रक्सौल भन्सारका अधिकारीहरुले बताएका छन्। रक्सौल भन्सारका एकजना अधिकारीले कोरोना महामारीले विश्व त्रसित भएकै कारण रक्सौल वीरगंज नाका भएर आउजाउ गर्ने सवारीसाधन तथा मालवस्तुको गाडीहरुमा केही मात्रामा असर गरेको बताए ।

पूर्णरुपले रक्सौल भएर निकासी गरिने मालसामान बीस प्रतिशतले कमी भए तापनि कोरोनाकै कारणले रक्सौल नाकाबाट आपूर्ति नैं ठप्प हुने अवस्था नरहेको उनको दावी छ। होलीले गर्दा दुवै भन्सारको चहलपहल कम भएको हुनसक्ने उनको भनाइ थियो।