काठमाडौं । नेपाली कांग्रेस संसदीय दलको निर्वाचनका लागि भएको मतदानका क्रममा ११ जना सांसदहरुले आफूले मत हालेको मतपत्रको तस्विर खिचेपछि महामन्त्री गगनकुमार थापाले आपत्ति जनाएका छन्।
बुधबार बिहान सिंहदरबारस्थित संसदीय दलको कार्यालयमा भएको मतदानका क्रममा प्रधानमन्त्री पत्नी आरजू राणा देउवा र गृहमन्त्री पत्नी मञ्जु खाणको निगरानीमा ११ जना सांसदहरूले मतपत्रको फोटो खिचेको महामन्त्री थापाको आरोप छ।
संसदीय दलका उम्मेदवार थापाको आँखै अगाडि उनीहरुले मतपत्रको फोटो खिचेका हुन्। महामन्त्री थापाले आफूहरुले विरोध गर्दगर्दै उनीहरुले फोटो खिचेको बताएका छन्।
‘मोबाइल फोन निषेध गर्दा पनि केही महिला सांसदहरुले छाप हालिएको फोटो खिचिएको भन्ने कुरा आएको छ’, उनले भने, ‘पार्टीको आन्तरिक निर्वाचन के होला भनेर हामीले स्वीकार गरेका छौँ। पार्टीका केही वरिष्ठ नेताहरु मतदान खसाउने ठाउँमै कुरेको भनेर बसिरहे। हामीले भन्दाभन्दै १०/११ जनाले छाप हालेको तस्बिर खिचे।’
उनले जनताद्वारा निर्वाचित सांसदहरुको यस्ता कार्यक्रम अशोभनीय भएको बताएका छन्। ‘एउटा त सांसद आफैंले पनि बुझ्ने कुरा हो। किन फोटो खिच्नु भएको हो ? कस कसले खिचेको हो सबैलाई थाहा छ’, उनले भने, ‘मैले नै गनेको थिएँ, १०/११ जना साथीहरुले तस्विर खिचेका छन्। यस्तो होला कि भनेर मैले त पहिले नै भनेको हो।’
उनले परिणाम जे आए पनि स्वीकारेर जाने बताए। ‘जे भए पनि अब परिणाम नस्वीकार्ने कुरै छैन। उहाँहरुले त्यो मतपत्रको फोटो छातीमा टाँसेर हिँडे पनि हुन्छ। ज-जसले खिच्नु भयो, उहाँहरुले बेलुका सामाजिक सञ्जालमा हाल्नुस्, मैले यसमा भोट हालेँ भनेर।’
कांग्रेस संसदीय दलको नेताका लागि सभापति शेरबहादुर देउवा र महामन्त्री गगनकुमार थापाबीच प्रतिस्पर्धा भएको थियो ।
प्रतिक्रिया दिनुहोस
Copyright © 2019 / 2024 - Kalapanimedia.com All rights reserved
