बागमतीको मुख्यमन्त्रीमा राप्रपाको दाबी

६६ प्रत्यक्ष र ४४ समानुपातिक गरी १ सय १० प्रदेशसभा सदस्य सिट संख्या रहेको बागमतीमा राष्ट्रिय प्रजातन्त्र पार्टीले मुख्यमन्त्री दाबी गरेपछि गठबन्धन राजनीति पेचिलो बनेको छ ।
सरकार बनाउन ५६ सिट आवश्यक पर्छ र एमाले, माओवादी केन्द्र र राप्रपा मात्र मिल्दा पनि बागमतीमा सहजै सरकार बन्न सक्ने स्थिति छ । तर सानो भनिएको १३ सिटको राप्रपाले मुख्यमन्त्री दाबी गरेको छ । एमालेले ४ प्रदेशमा आफ्नो सरकार दाबी गरिरहँदा बागमती पनि थियो । प्रदेश १, गण्डकी र कर्णालीमा एमालेको बलियो दाबी छदैँछ ।

बागमती प्रदेशमा कांग्रेसको ३७, एमालेको २७, माओवादी केन्द्रको २१, राप्रपाको १३, एकीकृत समाजवादीको ७, नेमकिपाको ३ र हाम्रो नेपाली पार्टीका २ सांसद छन् । प्रदेश सरकारको नेतृत्वमा सत्ता गठबन्धनका मुख्य तीन वटा दलहरू एमाले, माओवादी केन्द्र र राप्रपाको दावी छ ।

गठबन्धनमा छलफल भएर बागमती प्रदेश एमालेलाई परे जे एन थपलिया मुख्यमन्त्री हुनेछन् । पहिला एमालेले दुई मुख्यमन्त्री पाइसकेकाले यसपटक माओवादीको बलियो दाबी छ मुख्मयन्त्रीमा । माओवादीबाट शालिग्राम जमकट्टेल मुख्यमन्त्रीका उम्मेद्वार हुन् । तर ७ प्रदेशमध्ये धेरै सांसद बागमतीमा भएकाले र एउटा प्रदेशमा गठबन्धनले मुख्यमन्त्री राप्रपालाई दिनु पर्दा बागमती दिनु पर्ने राप्रपाको माग छ । राप्रपाबाट उद्धव थापा मुख्यमन्त्रीका उम्मेद्वार हुन् । एमालेले ३, माओवादीले २, राप्रपाले १ र एउटा प्रदेश जनमत र नागरिक उन्मुक्ति पार्टीले पाउने गठबन्धन सहमतिमा बागमतीमा राप्रपाको दाबीसँगै माओवादीलाई समस्या परेको छ ।

प्रदेशमा सरकार गठन गर्न आफू निर्णायक भएकाले पनि सरकारको नेतृत्वमा आफूहरूको दाबी स्वाभाविक रहेको राप्रपा बागमती प्रदेशका संसदीय दलका नेता उद्धव थापाले बताए । ‘राप्रपा सत्ता गठनको लागि निर्णायक शक्ति हो । त्यसैले प्रदेश सरकारको नेतृत्वमा हाम्रो स्वाभाविक दाबी रहन्छ,’ उनले भने, ‘हामी केन्द्रीय सरकारमा सहभागी हुने भनेका छौं । केन्द्रमा भागबन्डा अनुसारको पदहरुमा लिएर सरकारमा जान्छौं । सोहीअनुसार प्रदेशमा पनि हुन्छौं । तर, मुख्यमन्त्री हाम्रो हुनुपर्छ ।’