पुँजीवादीहरुले जति षड्यन्त्र गरेपनि जनताकै जित हुनेछ - विप्लव

काठमाडौ । नेपाल कम्युनिस्ट पार्टीका महासचिव नेत्रविक्रम चन्द ‘विप्लव’ले वामपन्थी र देशभक्त शक्तिहरु एक भएर दलाल पुँजीवादको अन्त्य गर्नुपर्ने बताएका छन् ।

सोमबार २८औँ जनयुद्ध दिवसका अवसरमा वक्तव्य जारी गर्दै महासचिव विप्लवले जनयुद्ध दिवस नेपाली श्रमिकका लागि गौरवपूर्ण पर्व भएको बताएका हुन् ।
विप्लवद्वारा जारी वक्तव्यमा भनिएको छ, ‘जनयुद्धले हामीलाई सामन्तवादबाट मुक्त गर्यो । किसान, मजदुर, महिला श्रमिक समुदाय, जनजाति, मधेसी, आर्य, मुश्लिम सबैलाई एकताबद्ध गरेर विद्रोहमा परिचालित गर्यो र एकस्तरको मुक्ति दिलायो । हामी नेपालमा नयाँ जनवादी सत्ता स्थापना गरेर वैज्ञानिक समाजवादतिर अगाडि बदन चाहन्थ्यौं तर भूमण्डलीकृत पूँजीवाद, दलाल पूँजीवाद र संशोधनवादा पहयन्त्रका कारण हाम्रो त्यो लक्ष्य पुरा हुन पाएन ।’
उनले देशले अहिले पनि भयानक संकटको सामना गरिहेको उल्लेख गर्दै भनेका छन्, ‘देशको कंगालीकरण, नवऔपनिवेशिक अवस्था र अराजकता अग्रगामी निकास पनि दलाल पुँजीवादको अन्त्य र वैज्ञानिक समाजवादको स्थापना गर्नु हो । तसर्थ सम्पूर्ण कम्युनिस्ट, बामपन्थी, प्रगतिशील, देशभक्त एवं लोकतान्त्रिक शक्तिहरु एक भएर देशलाई परिवर्तनतिर अगाडि बढाउन एकताबद्ध बनौँ ।’

एकीकृत जनक्रान्ति र वैज्ञानिक समाजवादमार्फत देशलाई निकास दिन सकिने उनको भनाइ छ । उनले भनेका छन्, ‘नेपाललाई दलाल पूँजीवादी सत्ता र भूमण्डलीकृत साम्राज्यवादको प्रभुत्व र उत्पीडनबाट मुक्त गराई छोडिने छ । पुँजीवादीहरुले जति नै षड्यन्त्र गरे पनि विजय जनताको नै हुने छ ।’