काठमाडौं । बेलायतमा ‘मेटाभर्स’मा बलात्कार भएको भन्दै पहिलो मुद्दा दर्ता भएको छ । अनलाइन मेटाभर्समा १६ वर्षीया युवतीमाथि सामूहिक बलात्कार भएको घटनामा प्रहरीले अनुसन्धान सुरु गरेको छ ।
पीडित नाबालिगले ‘अनलाइन मेटाभर्स’ को गेममा उनको अवतारलाई केही व्यक्तिले सामूहिक बलात्कार गरेको बताएकी छिन् । जसकाकारण नाबालिग स्तब्ध र डराएको बताइएको छ । उनले वास्तविक संसारमा यौन शोषण भइरहेका बेला भर्चुअल संसारमा पनि यस्तै समस्या भोग्नुपरेको बताएकी छिन् ।
मेटाभर्सको भर्चुअल संसारमा यस प्रकारको बलात्कारको यो पहिलो घटना भएको बताइएको छ । बालिकाले बलात्कार पीडित जस्तै मानसिक यातना सहनु परेको छ । ती १६ वर्षीया नाबालिगले इमर्सिभ गेममा भर्चुअल रियालिटी (भीआर) हेडसेट प्रयोग गरिरहेकी थिइन् ।
यसै क्रममा उनीमाथि आक्रमण भएको डेली मेलको रिपोर्टमा उल्लेख छ । बेलायती अधिकारीहरुलाई उद्धृत गरिएको उक्त रिपोर्टमा पीडितलाई कुनै शारीरिक हानी नभएको तर घटनाले उनलाई परेको भावनात्मक र मनोवैज्ञानिक असरलाई गम्भीर रूपमा लिएको उल्लेख छ । पहिलो भर्चुअल यौन अपराध भएकाले प्रहरीलाई पनि अनुसन्धान गर्न समस्या भइरहेको छ ।
यस्तो अपराधका लागि कानूनमा व्यवस्था नभएकाले नयाँ चुनौती खडा भएकोे अधिकारीहरू बताउँछन् ।
प्रतिक्रिया दिनुहोस
Copyright © 2019 / 2024 - Kalapanimedia.com All rights reserved
