वीरगञ्ज । आगामी सोमबार अर्थात, माघ ८ गते, जनवरी २२ मा भारतको अयोध्यामा नवनिर्मित राम मन्दिरको प्राण प्रतिष्ठा हुँदै छ। त्यसको चहलपहल भारतमा मात्रै नभएर नेपालमा पनि उत्तिकै छ। नेपालमा पनि उक्त दिन माछामासु नखान, बिक्री वितरण नगर्न पालिकाहरुले सूचना जारी गरिरहेका छन्। मधेश प्रदेशका कतिपय पालिकाहरुले त उक्त दिन दिपावली मनाउन पनि पालिकाबासीहरुलाई आग्रह गरेका छन्।
अहिले पर्साको सदरमुकामदेखि विभिन्न स्थानमा भगवान रामको तस्बिर अंकित झण्डा सवारी साधनमा देखिन्छ। चोकचोकमा भगवान रामको झण्डाहरु लगाइएका छन्। पर्साको सदरमुकाम र मधेसको एक मात्र महानगर वीरगञ्ज महानगरले माघ ८ गतेकै दिन पारेर वीरगञ्जको घडीअर्वामा रहेको रामजानकी मन्दिरमा प्राण प्रतिष्ठा नै आयोजना गर्ने भएको छ।
अझ वीरगञ्ज महानगरपालिकाले त सूचना नै जारी गरेर सोमबार वीरगञ्जको रामजानकी मन्दिरमा पनि भगवान रामको प्राण प्रतिष्ठा हुने भएकोले उक्त दिन पशुपंक्षी जीवजन्तुको बध, मदिरा, माछामासुको बिक्री वितरणलगायतका कार्यहरु नगर्न भनेको छ। यस्ता कार्यहरु गरेको पाइए नियमानुसार महानगरले कारबाही गर्ने चेतावनीसमेत दिएको छ। यस्तै, जिल्लाको कालिकामाई गाउँपालिकाका, धोबिनी गाउँपालिका र छिपहरमाई गाउँपालिकाले पनि माघ ७ र ८ गते दीपावली गर्न आग्रह गरेका छन्।
प्रतिक्रिया दिनुहोस
Copyright © 2019 / 2026 - Kalapanimedia.com All rights reserved
