हेटौडा । राज्ञा ज्ञानेन्द्र शाहले बारा र मकवानपुरको सिमानामा पर्ने चुरियामाई मन्दिर र हेटौंडा– १३ पदमपोखरीमा रहेको ज्याङ्छुपलिङ पोताला गुम्बामा पुजाअर्चना गर्नुभएको छ । उहाँले दिउँसो १ बजे चुरियामाई मन्दिरमा हिन्दु परम्परा अनुसार र दिउँसो २ः४५ बजे ज्याङ्छुपलिङ पोताला गुम्बामा बौद्ध परम्परा अनुसार पुजाअर्चना गर्नुभएको हो ।
त्यसपछि उहाँ हेटौंडा १०-मा अवस्थित भुटनदेवी मन्दिरको दर्शन गर्न पुग्नुभएको थियो । राजासँगै रानी कोमल राज्यलक्ष्मी शाह र राजकुमारी प्रेरणा राज्यलक्ष्मी सिंहले पनि उक्त धार्मिकस्थलको दर्शन गरी पुजाअर्चना गर्नुभएको हो ।
राजा शाहले मठमन्दिरको दर्शन पछि आजै हेटौंडा- ५ मा रहेको हेटौंडा रिर्सोटमा स्थानीय तथा राष्ट्रवादीहरुसंग विशेष भेटघाट गर्नुभएको छ । उहाँको स्वागतमा समर्थक तथा शुभेच्छुकहरुले ठाउँ ठाउँमा स्वागत गेट बनाउनुका साथै र्याली निकालिका थिए ।
राप्रपाका केन्द्रीय सदस्य एवम् प्रतिनिधिसभा सदस्य दीपकबहादुर सिंह, राप्रपाका विभिन्न तहका नेता तथा कार्यकर्ताहरु, राप्रपा नेपालका नेता तथा कार्यकर्ताहरु, उद्योगपति तथा व्यापारी एवम् हजारौँको संख्यामा रहेका सर्वसाधारणहरुले राजा रानीको स्वागत गरेका हुन्।
राजाको स्वागतका लागि पुगेका राप्रपा र राप्रपा नेपालका कार्यकर्ताहरुले नेपालको झण्डा बोकेका थिए । स्थानीयको भिडमा महिला र वृद्धवृद्धाको संख्या ठूलो थियो । भिड छिचोल्न सुरक्षाकर्मी र स्वयम्सेवकलाई हम्मेहम्मे परेको थियो ।
प्रतिक्रिया दिनुहोस
Copyright © 2019 / 2026 - Kalapanimedia.com All rights reserved
