सरकारले संसद् कर्मचारीका जायज माग तत्काल पूरा गर्नुपर्छ - सांसद केसी

काठमाडौं स् प्रमुख प्रतिपक्ष दल नेपाली कांग्रेसका सांसद अर्जुननरसिंह केसीले संसद सचिवालयका कर्मचारीको जायज माग तत्काल सम्बोधन गर्न सरकारसँग माग गरेका छन्। आइतबार प्रतिनिधिसभा बैठकको शून्य समयमा बोल्दै उनले सो कुरा बताएका हुन्।

सांसद केसीले नुवाकोटको ऐतिहासिक महत्वको साततले दरबार पुनर्निर्माणमा चासो नदिएको भन्दै सरकारप्रति आक्रोश व्यक्त गरे। २०७२ सालको भूकम्पले थिलथिलो बनाएको सो दरबारको पुनर्निर्माणको काम चीन सरकारले गर्ने भने पनि अहिलेसम्म सुरु हुन नसकेकाले सरकारले नै सो काम तत्काल सुरु गर्नुपर्ने उनले दबाब दिए।

सांसद केसीले चीन सरकारले सो दरबारको पुनर्निर्माणको काम गर्ने नगर्ने भन्नेबारे पनि सरकारले तत्काल वार्ता गर्नुपर्ने आवश्यकता औंल्याए।

उनले भने, ‘नुवाकोटको ऐतिहासिक सात तले दरबार २०७२ सालको भूकम्पले क्षतिग्रस्त बनाएको नौ वर्ष भयो। पुनर्निर्माण हुन नसक्दा खण्डहरको रुपमा परिणत भएको छ। चीन सरकारले बनाई दिने घोषणा त गर्‍यो। तर आजसम्म त्यसै थिलथिलो रहेको छ। यसबारे पटक पटक मैले कुरा उठाए। तर कुनै पनि सरकारले पटक्कै ध्यान नदिएकोप्रति खेद व्यक्त गर्दै यसको पुनर्निर्माणमा चीन सरकारसँग तत्कालै वार्ताद्वारा टुंग्याउने वा सरकारले नै युद्धस्तरमा कार्य सुरु गर्ने काम तत्काल गरोस्। संसद सचिवालयका कर्मचारीहरुको जायज माग तुरुन्त पूरा गरियोस्।’

सांसद केसीले भूकम्पपछिको पुनर्निर्माणको काममा सरकार अझै गम्भीर नभएको आरोप पनि लगाए।