बोलिभियाका पूर्वराष्ट्रपति मोरालेस सवार कारमा गोली प्रहार

काठमाडौं । बोलिभियाका पूर्वराष्ट्रपति इभो मोरालेस सवार कारमा गोली प्रहार भएको छ।

केन्द्रीय शहर कोचाबाम्बामा रेडियो अन्तर्वार्ताका लागि यात्रा गर्दा बन्दुकधारीले गोली प्रहार गर्दा कार चालक घाइते भएका छन्। ‘म आइपुगेको कारमा १४ वटा गोली लागेका प्वाल छन्’, मोरालेसले भने, ‘यो योजनाबद्ध थियो । मलाई मार्ने विचार थियो।’

अन्तर्वार्ता गर्ने रेडियो स्टेसन कौसाचुन कोकाले मोरालेस सवार भएको गोली लागेको पिकअप ट्रकको भिडियो सार्वजनिक गरेको छ । विन्डशिल्डमा तीन गोली लागेका प्वाल थिए र चालकको टाउकोमा रगत देखिन्थ्यो। मोरालेसले वर्तमान राष्ट्रपति लुइस आर्सेलाई आक्रमणको दोष लगाए। लुइस आर्से मोरालेसका पूर्वसहयोगी र मन्त्रिपरिषद् सदस्य थिए ।

दुवैबीच सम्बन्ध बिग्रिएको छ। ‘लुचोले बोलिभियालाई नष्ट गरेका छन् र अब उनी इभोलाई मारेर हाम्रो प्रक्रियालाई समाप्त गर्न चाहन्छन्’, मोरालेसले राष्ट्रपतिको उपनाम प्रयोग गर्दै आफ्नै राष्ट्रपति पद पुनः प्राप्त गर्ने प्रयासका बारेमा भने। हाल ६५ वर्षकामोरालेस २००६ देखि २०१९ सम्म राष्ट्रपति थिए। चौथो कार्यकालका लागि संविधान छल्ने प्रयास नगर्दासम्म उनी बोलिभियामा अत्यन्त लोकप्रिय हुनुहुन्थ्यो ।

धाँधलीको आरोप लागेको चुनावपछि सेनाको समर्थन गुमाएपछि उनलाई राजीनामा दिन बाध्य पारियो र उहाँ मेक्सिको भागे। उहाँ सन् २०२० मा राजनीतिक पुनर्जीवनको खोजीमा बोलिभिया फर्किए। उनी र आर्से दुवै सन् २०२५ अगस्टको राष्ट्रपतीय चुनावमा सत्तारूढ एमएएस पार्टीको उम्मेदवारीका लागि प्रतिस्पर्धा गर्दैछन्।

यद्यपि मोरालेसलाई कानूनी रूपमा फेरि उम्मेदवार बन्न प्रतिबन्ध लगाइएको छ । मोरालेसमाथि सन् २०१५ मा उहाँको राजनीतिक युवा गार्डकी १५ वर्षीया सदस्यसँगको कथित यौनसम्बन्धका लागि बलात्कार, मानव बेचबिखन र मानव तस्करीको अनुसन्धान भइरहेको छ ।

उनका समर्थकहरूले दुई हप्तादेखि देशभरका प्रमुख सडकहरू अवरुद्ध गरेर विरोध गरिरहेका छन् ।