काठमाडौं । पत्रकार श्यामसुन्दर पुडासैनीको निधन भएको छ। गएराति ११ बजेतिर चावहिलस्थित हेल्पिङ ह्याण्ड्स अस्पतालमा पुडासैनीको निधन भएको उनी कार्यरत नेपाल भ्युज डटकमका सम्पादक मधुसुदन पन्थीले जानकारी दिए।
नेपाल भ्यूज डटकमका उपसम्पादक उनी काम सकेर कार्यालयबाट कपनस्थित रहेको कोठामा फर्किएका थिए। कोठामा फर्किएको केहीबेरमै साढे १० बजेतिर उनी एक्कासी ढलेका थिए। तत्काल घरपति र छिमेकीले उनलाई चावहिलस्थित अस्पताल पुर्याएका थिए।
अस्पताल पुर्याउनासाथ चिकित्सकले उनको निधन भएको घोषणा गरे। उनलाई हृदयाघात भएको अनुमान गरिएको छ। अहिले उनको काठमाडौंको टिचिङ अस्पताल मा पोस्टमार्टम भएरहेको र आजै दिउसो पशुपति आर्यघाटमा उनको अन्तिम सस्कार गरिने जानकारीमा आएको छ ।
वाकोटमा जन्म घर भएका उनले हिमालय टाइम्स,माउण्टेन टेलिभिजन, प्राइभटाइम्स टेलिभिजन र रेडियो अन्नपूर्णलगायत सञ्चारमाध्यममा समेत काम गरेका थिए।
सत्य र खोजमुलाक समाचार लेख्ने उनी एक निडर अनि निस्पक्ष पत्रकारका रुपमा हेरिन्छन । एक असल, साहसी निडर अनि सत्यको पक्षमा कलम चाल्ने होनहार अनि मिलनसार मित्र गुमाउँदा सिङ्गो संचार जगत नै शोकमा डुबेको छ । यस्ता मिलनसार मित्रलाई कालापानी मिडिया परिवारको तर्फबाट हार्दिक श्रद्धाञ्जली ।
प्रतिक्रिया दिनुहोस
Copyright © 2019 / 2025 - Kalapanimedia.com All rights reserved
