केएमसीले खुवायो आफ्ना महिला कर्मचारीहरुलाई तीजको दर (तस्बिरहरु)

काठमाडौं । काठमाडौं मेडिकल कलेज (केएमसी)ले तीज पर्वको अवसरमा विशेष कार्यक्रम आयोजना गर्दै कार्यरत महिला चिकित्सक, नर्स तथा कर्मचारीहरूलाई दर खुवाएको छ ।

शुक्रबार कलेज परिसरमा सांस्कृतिक कार्यक्रम गर्दै उत्साहपूर्ण वातावरणमा दर खाने कार्यक्रम सम्पन्न भएको हो । कार्यक्रममा एक अर्काबिच शुभकामना आदान–प्रदानका गर्नुका सथै उत्सवको रुपमा मनाइएको थियो ।

केएमसीले हरेक वर्ष तीजका अवसरमा दर खुवाउने परम्परालाई निरन्तरता दिँदै आएकोमा यस वर्ष पनि भव्य रूपमा दर कार्यक्रम मनाएको हो ।

कार्यक्रममा सहभागी महिला कर्मचारीहरूले तीजका विशेष परिकारहरूको स्वाद लिँदै आपसमा शुभकामना साटासाट गरे । उनीहरूले यस अवसरले आपसी आत्मीयता र सहकार्यलाई थप प्रगाढ बनाउने विश्वास व्यक्त गरे ।

कलेजका प्रमुख कार्यकारी अधिकृत नारायण प्रसाद दाहालले कार्यक्रमलाई सम्बोधन गर्दै तीज पर्वको सांस्कृतिक र सामाजिक महत्त्वबारे चर्चा गरे । उनले यस्ता कार्यक्रमहरूले कार्यस्थलमा उत्सवमय वातावरण सिर्जना गर्नुका साथै महिला कर्मचारीप्रति सम्मान र प्रेरणा जगाउने बताए ।

कार्यक्रममा विभिन्न परिकारका दर, फलफूल तथा परम्परागत मिठाइहरूको व्यवस्थापन गरिएको थियो । सहभागी सबैलाई दर वितरण गरी सामूहिक भोजन गराइएको थियो ।

महिला चिकित्सक, नर्स र अन्य कर्मचारीहरूले कलेजप्रतिको कृतज्ञता प्रकट गर्दै यस्ता कार्यक्रमले आफ्नो व्यावसायिक जीवनमा छुट्टै उत्साह थप्ने प्रतिक्रिया दिएका छन् ।