कञ्चनपुरमा बिदेशबाट आएकाहरुको तथ्यांक सार्वजनिक

२० चैत, कञ्चनपुर । कञ्चनपुरमा भारत सहित तेस्रो मुलुकबाट फर्किएकाहरुको तथ्याङ्क सार्वजनिक गरिएको छ। जिल्लाका नौ वटै स्थानीय तहले संकलन गरेको विवरण अनुसार भारत सहितका मुलुकबाट स्वदेश फर्किएकाहरुको संख्या ४ हजार सात सय बढि रहेको स्थानीय प्रशासनले जनाएको छ।

जिल्ला प्रशासन कार्यालय कञ्चनपुरले नौ वटै स्थानीय तहमा चार हजार सात सय ९२ जना विदेशबाट फर्किएको पाईएको जनाएको छ। जिल्लामा सबैभन्दा बढि कृष्णपुर नगरपालिकाबाट विदेशबाट फर्किएका छन्। कृष्णपुर नगरपालिकामा सबैभन्दा बढि भारत र युएईबाट आठ सय १९ जना फर्किएका छन्।

यस्तै वेदकोट नगरपालिकामा भारत र अन्य देशबाट सात सय ५५ जना, शुक्लाफाटा नगरपालिकामा भारत, युएई र जर्मनीबाट सात सय ५० जना, पुर्नवास नगरपालिकामा भारत र अन्य मुलुकबाट सात सय ३० जना, भीमदत्त नगरपालिकामा भारत र कतारबाट सात सय २० जना फर्किएका छन्।

यसैगरी महाकाली नगरपालिकामा भारत र मलेसियाबाट तीन सय ६० जना, बेलौरी नगरपालिकामा भारत र युएईबाट दुई सय ६९ जना, बेल्डाडी गाउँपालिकामा भारतबाट मात्र दुई सय ५५ जना र लालझाडी गाउँपालिकामा भारत, साउदी अरब र युएईबाट एक सय ३४ जना स्वदेश फर्किएका छन्।

जिल्लामा चार हजार सात सय बढि भारत सहित तेस्रो मुलुकबाट फर्किएको भएपनि अहिले सम्म ५१ जनालाई मात्र क्वारेन्टाईनमा राखिएको छ। अन्य सबैलाई सेल्फ क्वारेन्टाईनमा बस्न आग्रह गरिएको छ।

सेल्फ क्वारेन्टाईनमा बसेकाहरुमाथि पनि स्वास्थ्यकर्मीले घर–घरमै पुगेर निगरानी गरिरहेको कञ्चनपुरका प्रमुख जिल्ला अधिकारी नूरहरी खतिवडाले जानकारी दिए।

दिनेश खबर