यी नदिहरुमा आउन सक्छ बाढी

बंगालको खाडीबाट भित्रिएको जलवाष्पयुक्त मनसुनी हावाले अहिले देशभर वर्षा गराइरहेको छ। अहिले मधेस प्रदेशदेखि लुम्बिनीसम्म वर्षा भइरहेको छ।

सबैतिर मध्यम वर्षा भइरहेको छ। यद्यपि शनिबार दिउँसो अर्को प्रणाली भित्रँदै गरेकाले त्यसले ठूलो वर्षा गराउने सम्भावना छ। बाढी पूर्वानुमान महाशाखाका अनुसार शनिबार दिउँसोसम्म सबै प्रमुख नदीहरूको अवस्था सतर्कता तह भन्दा तलै रहनेछ। शनिबार दिउँसोदेखि मधेस, बागमती, गण्डकी र लुम्बिनी प्रदेश भई बहने नदीहरूमा बहाव उल्लेख्य बढ्न सुरू गर्नेछ।

शनिबार राति नवलपरासी पश्चिम, नवलपरासी पूर्व, तनहुँ, लम्जुङ, गोरखा, धादिङ, चितवन, मकवानपुर, बारा, पर्सा, रौतहट, सर्लाही, काठमाडौं, भक्तपुर, ललितपुर, काभ्रे, सिन्धुली र आसपासका जिल्लाहरू भई बहने स–साना नदीनालाहरूमा आकस्मिक बाढीको जोखिम रहेको महाशाखाले जनाएको छ।

भोलि आइतबार बिहानदेखि बेलुकी सम्मको अवधिमा नारायणी, कालिगण्डकी, सेती, मादी, मर्स्याङ्दी, दरौंदी, त्रिशूली, पूर्वी राप्ती, बागमती, कमला र आसपासका नदीहरू तथा तिनका शाखा नदीहरूमा बहाव उल्लेख बढ्ने र सतर्कताको तह आसपास पुग्न सक्ने आकलन गरिएको छ।

आइतबार रातिदेखि कोशी, कन्काई लगायत नदी जलाधारका क्षेत्रमा समेत बहाब उल्लेख्य बढ्न सक्ने महाशाखाले बताएको छ। त्यसैले बाढी र डुवान हुन सक्ने तटीय क्षेत्रमा उच्च सतर्कता जरुरी रहेको महाशाखाले भनेको छ।

कमजोर तथा भिरालो जमिनमा पहिरोको जोखिम रहेकोले आवश्यक सतर्कता अपनाउन महाशाखाले आग्रह गरेको छ।