रास्वपाको रहस्यमय भूमिका - साम्प्रदायिक तनाव समाधानको वार्ता र मागपत्रमा पार्टीकै नेताहरूको सहभागिता

काठमाडौं । सुनसरी र धनुषामा देखिएका साम्प्रदायिक तनावका बेला तटस्थ मध्यस्थकर्ताको भूमिका निर्वाह गरेको भनिएको राष्ट्रिय स्वतन्त्र पार्टी ९रास्वपा० र पार्टी सभापति रवि लामिछानेको पहलमाथि नयाँ प्रश्न उठेको छ। विवाद समाधानका लागि भनिएका वार्ता र ज्ञापनपत्र बुझाउने कार्यक्रममा संलग्न मुख्य व्यक्तिहरू अन्य कोही नभई रास्वपाकै आन्तरिक नेता तथा कार्यकर्ता रहेको खुलेको छ।

१- हिन्दू अगुवाको आवरणमा रास्वपा नेता
सुनसरीमा साम्प्रदायिक तनाव उत्कर्षमा पुगेका बेला रास्वपा सभापति रवि लामिछानेले हिन्दू र मुस्लिम समुदायका अगुवाहरूबीच संवादको पहल गरेका थिए। उक्त वार्तामा ‘हिन्दू अगुवा’ का रूपमा सहभागी राजुराज फुँयाल रास्वपाका नेता रहेको खुलेको छ।

फुयाँल हालै चितवनमा सम्पन्न रास्वपाको महाधिवेशनमा केन्द्रीय सदस्यको उम्मेदवार भएर पराजित भएका थिए। उनले ‘विश्व हिन्दू महासंघ’ को प्रतिनिधि भन्दै वार्तामा सहभागिता जनाएको बताए पनि उनको मुख्य राजनीतिक पहिचान रास्वपाकै नेताको रूपमा रहेको पाइएको छ।

२- गृहमन्त्रीलाई मागपत्र बुझाउने स्थानीय वडासभापति
त्यसैगरी, धनुषामा ‘संयुक्त हिन्दू मोर्चा’ को नामबाट नेपाललाई हिन्दू राष्ट्र घोषणा गर्नुपर्ने मागसहित गृहमन्त्रीलाई ज्ञापनपत्र बुझाउने मुख्य व्यक्ति पनि रास्वपाकै स्थानीय नेता रहेको खुलेको छ।

मागपत्रमा पहिलो हस्ताक्षर गर्ने र गृहमन्त्रीलाई ज्ञापनपत्र थमाउने शनी भगत जनकपुर उपमहानगरपालिका वडा नं.८ का रास्वपा वडासभापति हुन्। उनले ‘हिन्दू सम्राट सेना’ को प्रतिनिधि भन्दै हस्ताक्षर गरे पनि उनी उक्त संस्थाको क्रियाशील सदस्यसमेत नरहेको बुझिएको छ।

बाहिर तटस्थ सामाजिक वा धार्मिक पहल तथा नागरिकको स्वतःस्फूर्त माग जस्तो देखिए पनि यी घटनाक्रमहरूले राजनीतिक लाभ वा कृत्रिम वातावरण तयार पार्न दलकै आन्तरिक मान्छेहरूलाई विभिन्न समूहको प्रतिनिधि बनाएर अगाडि सारिएको आशंकालाई बल पुर्याएको छ।