काठमाडौं । इन्डियन आयल कर्पोरेसन (आईओसी) बाट पेट्रोलियम पदार्थको मूल्य बढेर आए पनि नेपाल आयल निगमले हालसम्म नयाँ मूल्यसूची सार्वजनिक गरेको छैन।
सामान्यतया प्रत्येक अंग्रेजी महिनाको १ र १६ तारिखमा नयाँ मूल्यसूची सार्वजनिक गर्ने गरे पनि यसपटक भारतबाट मूल्य दोहोरो अंकले बढेर आएका कारण निर्णयमा ढिलाइ भएको हो। स्वचालित मूल्य प्रणालीअनुसार २ रुपैयाँसम्म मात्र मूल्य घटाउने वा बढाउने अधिकार निगम व्यवस्थापनलाई हुने र सोभन्दा बढी मूल्य हेरफेर गर्नुपर्ने अवस्थामा सञ्चालक समितिको बैठक बस्नुपर्ने कानुनी व्यवस्था छ।
निगमका प्रवक्ता मनोजकुमार ठाकुरले प्राप्त नयाँ मूल्यमा ठूलो परिवर्तन भएकाले सञ्चालक समितिको बैठक बसेर निर्णय भएपछि मात्र नयाँ मूल्यसूची सार्वजनिक गरिने जानकारी दिएका छन्। शनिबार र आइतबारको सार्वजनिक बिदाका कारण सञ्चालक समितिको बैठक बस्न ढिलाइ भएको स्रोतको भनाइ छ।
उद्योग, वाणिज्य तथा आपूर्ति मन्त्रालयका सचिव नारायणप्रसाद शर्मा दुवाडीको अध्यक्षतामा रहेको सञ्चालक समितिको बैठक बसेर औपचारिक निर्णय गरेपछि मात्र पेट्रोलियम पदार्थको नयाँ मूल्य कार्यान्वयनमा आउनेछ। अन्तर्राष्ट्रिय बजारमा कच्चा तेलको मूल्य बढेका कारण नेपालमा पनि अब पेट्रोलियम पदार्थको मूल्य बढ्ने निश्चितप्रायः देखिएको छ।
प्रतिक्रिया दिनुहोस
Copyright © 2019 / 2026 - Kalapanimedia.com All rights reserved
