काठमाडौं । अर्थमन्त्री डा. स्वर्णिम वाग्लेले आज नेपालमा लगानी गरेका बहुराष्ट्रिय कम्पनीका सञ्चालक तथा उच्चपदस्थ अधिकारीहरूसँग छलफल गर्ने भएका छन।
आर्थिक वर्ष २०८३/८४ को बजेट कार्यान्वयन छलफल शृङ्खला अन्तर्गत नेपालमा लगानी गरेका २० ठूला करदाता बहुराष्ट्रिय कम्पनीहरूसँग मन्त्री वाग्लेले परामर्श गर्न लागेका हुन् । अर्थ मन्त्रालयको सुवर्ण हलमा मध्याह्न १२ बजे सुरु हुने उक्त संवादमा ती कम्पनीका उच्चपदस्थ विदेशी तथा स्वदेशी साझेदारहरूलाई आमन्त्रण गरिएको छ।
छलफलका क्रममा अर्थमन्त्री वाग्लेले बहुराष्ट्रिय कम्पनीहरूलाई बजेटमार्फत दिइएका सुविधा, उनीहरूले वर्तमान समयमा भोगिरहेका व्यावसायिक समस्या तथा नेपालमा लगानी विस्तारका सम्भावनाबारे छलफल गर्नुहुनेछ। यसका साथै देशभित्र थप रोजगारी सिर्जना गर्ने र अर्जित प्रतिफल (नाफा) सहज रूपमा फिर्ता लैजान सरकारले गर्नुपर्ने नीतिगत तथा प्रशासनिक सहजीकरणका सम्बन्धमा समेत कुराकानी हुने मन्त्रालयले जनाएको छ।
अर्थमन्त्रीले उद्योगी–व्यवसायीहरूलाई आफ्ना समस्या तथा सुझावहरू मौखिकसँगै लिखित रूपमा समेत पेस गर्न आग्रह गर्नुहुनेछ। बजेट कार्यान्वयनलाई प्रभावकारी बनाउने उद्देश्यले सञ्चालित यस छलफल शृङ्खलाअन्तर्गत यसअघि अर्थमन्त्री डा.वाग्लेले उत्पादनमूलक उद्योग सञ्चालन गरी ठूलो मात्रामा रोजगारी सिर्जना गरेका ३३ औद्योगिक घरानाका प्रतिनिधिसँग छलफल गरिसक्नुभएको छ।
त्यसैगरी उहाँले नेपालका क वर्गका वाणिज्य बैंकका प्रमुख कार्यकारी अधिकृत र नेपाल राष्ट्र बैंकका कार्यकारी निर्देशकहरूसँग पनि चरणबद्ध संवाद पूरा सकेका छन् ।
प्रतिक्रिया दिनुहोस
Copyright © 2019 / 2026 - Kalapanimedia.com All rights reserved
