काठमाडौं । पोखरा क्षेत्रीय अन्तर्राष्ट्रिय विमानस्थल निर्माणमा भ्रष्टाचार गरेको अभियोग लागेका पूर्वअर्थमन्त्री ज्ञानेन्द्रबहादुर कार्की १५ लाख रुपैयाँ धरौटीमा रिहा भएका छन्। विशेष अदालतको आइतबारको इजलासले उनलाई धरौटीमा छाड्ने आदेश दिएको हो।
अख्तियार दुरुपयोग अनुसन्धान आयोगले कार्की अर्थमन्त्री भएका बखत ठेकेदार कम्पनी 'चाइना सीएएमसी इन्जिनियरिङ'लाई मूल्य अभिवृद्धि कर (भ्याट) लगायतका महसुल छुट दिन 'इम्प्लिमेन्टेसन एग्रिमेन्ट'मा गलत प्रावधान राखी राज्यलाई नोक्सानी पुर्याएको दाबी गर्दै ३ अर्ब ६२ करोडभन्दा बढीको बिगो माग दाबीसहित मुद्दा दायर गरेको थियो।
बहसका क्रममा पूर्वमन्त्री कार्कीका कानुन व्यवसायीहरूले उनले कुनै नयाँ प्रावधान नराखी नेपाल–चीनबीचको ऋण सम्झौता मात्र कार्यान्वयन गरेको तर्क पेस गरेका थिए।
अदालतले तत्कालीन पदीय हैसियत, भूमिका र प्राप्त प्रमाणहरूको विश्लेषण गर्दै कार्कीलाई थुनामै राखेर मुद्दा अगाडि बढाउनु नपर्ने निष्कर्ष निकालेको छ। तोकिएको धरौटी बुझाएर कार्की अब बाहिरै रहेर मुद्दाको सामना गर्न पाउनेछन्।
प्रतिक्रिया दिनुहोस
Copyright © 2019 / 2026 - Kalapanimedia.com All rights reserved
