रूपन्देही । जनता समाजवादी पार्टी नेपाल जसपाले लुम्बिनी सरकारलाई दिएको समर्थन फिर्ता लिन पार्टी केन्द्रको निर्देशन विपरीत एमाले नेतृत्वको सरकारलाई विश्वासको मत दिने निर्णय गरेको छ ।
प्रदेश संसदीय दलको बैठक बसेर मुख्यमन्त्री आचार्यलाई विश्वासको मत दिने निर्णय भएको सो पार्टीका प्रमुख सचेतक हेमा वेल्वासेले जनाएकी छन् । आज बिहान मात्र सो पार्टीका महासचिव डा. सुरेन्द्र कुमार झाले विज्ञप्ति जारी गर्दै चेतनारायण आचार्य नेतृत्वको सरकारलाई दिएको समर्थन फिर्ता लिएको बताएका थिए । तर लुम्बिनीमा रहेको संसदीय दलले यसलाई अस्वीकार गरेको हो ।
प्रदेश सभामा मुख्यमन्त्री चेतनारायण आचार्यले विश्वासको मत मागेसँगै प्रदेश सभा आठौँ अधिवेशनको उन्नाइसौँ बैठकलाई सम्बोधन गर्दै प्रमुख सचेतक वेल्वासेले सरकारलाई दिएको समर्थन यथावत् रहेको र विश्वासको मतमा फेरबदल नहुने बताएकी हुन् । ‘हाम्रो पार्टी सरकार फेरबदलको पक्षमा छैन, सरकारलाई समर्थनसँगै विश्वासको मत दिने निर्णय संसदीय दलले गरेको छ, सरकारले राम्रो गर्दा समर्थन तथा कमजोरी भए विरोध गर्ने नीति रहेको छ’ उनले भनिन् ।
प्रतिक्रिया दिनुहोस
Copyright © 2019 / 2026 - Kalapanimedia.com All rights reserved
