काठमाडौँ। राष्ट्रिय प्रजातन्त्र पार्टी (राप्रपा) बाट अलग भई ‘जय नेपाल पार्टी’ गठन गरेका नेता धवलशम्शेर राणाले राजा ज्ञानेन्द्र शाहसँग भेटवार्ता गरेका छन्।
शनिबार ‘हिमानी ट्रष्ट’ द्वारा आयोजित विशेष कार्यक्रममा सहभागी भएपछि नेता राणा र राजा शाहबीच दोहोरो राजनीतिक संवाद भएको हो। उक्त कार्यक्रममा युवराज्ञी हिमानी शाहले कोरेका तीन वटा मौलिक चित्रकलाहरू लिलामीमा राखिएका थिए। चित्रकला लिलामीबाट सङ्कलित रकम बाजुराका आमा तथा बालबालिकाको पोषण र स्वास्थ्य सुधारमा सहयोग गरिने जनाइएको छ।
कार्यक्रमपश्चात् भएको भेटका क्रममा राणाले मुलुकको वर्तमान राजनीतिक परिस्थिति र हालै गठन गरिएको ‘जय नेपाल पार्टी’ को नीति तथा एजेन्डाबारे राजालाई जानकारी गराएका थिए। जवाफमा राजा शाहले देशको विद्यमान अवस्थालाई ध्यानमा राख्दै सम्पूर्ण राष्ट्रवादी शक्तिहरूलाई एकजुट बनाएर अगाडि बढ्न राणालाई आग्रह गर्नुभएको छ ।
नेता राणाले सामाजिक सञ्जालमार्फत राजासँगको भेटघाट अत्यन्तै सकारात्मक र फलदायी रहेको उल्लेख गरेका छन्।
सनातन हिन्दु राष्ट्र र राजसंस्था पुनःस्थापनालाई मुख्य एजेन्डा बनाएर अघि बढेको जय नेपाल पार्टीका लागि यो भेटलाई महत्त्वपूर्ण रूपमा हेरिएको छ।
प्रतिक्रिया दिनुहोस
Copyright © 2019 / 2026 - Kalapanimedia.com All rights reserved
