बाजुरा। धार्मिक तथा पर्यटकीय दृष्टिले अत्यन्तै महत्वपूर्ण मानिने बाजुराको बडीमालिका क्षेत्रमा टेलिफोन तथा इन्टरनेट सेवा पुगेको छ।
नेपाल टेलिकमले बडीमालिका क्षेत्रमा फोर–जी (4G) सेवा विस्तार गरेसँगै मोबाइल तथा इन्टरनेट सेवा औपचारिक रूपमा सञ्चालनमा आएको हो। जनैपूर्णिमाका अवसरमा बडीमालिकामा लाग्ने प्रसिद्ध धार्मिक मेलाको पूर्वसन्ध्यामा यो सेवा सञ्चालनमा ल्याइएको हो।
टावर जडानको कार्य सम्पन्न भएसँगै फोर–जी सेवा सञ्चालनमा ल्याइएको हो। सूचना तथा सञ्चारमन्त्री डा. विक्रम तिमिल्सिनाले भर्चुअल माध्यमबाट उक्त सेवाको उद्घाटन गर्नुभएको हो।
सो अवसरमा बोल्दै मन्त्री तिमिल्सिनाले दुर्गम भूगोलमा रहेका नागरिकलाई पनि सञ्चारको आधारभूत अधिकारबाट वञ्चित हुन नदिन सरकार पूर्ण रूपमा प्रतिबद्ध रहेको बताउनुभयो।
समुद्री सतहबाट करिब चार हजार दुई सय मिटरको उचाइमा रहेको बडीमालिका क्षेत्रमा सञ्चार सेवा पुगेपछि स्थानीयवासी, तीर्थयात्री, पर्यटकका साथै सरकारी तथा गैरसरकारी निकायलाई सम्पर्क गर्न ठूलो सहजता मिल्ने अपेक्षा गरिएको छ।
प्रतिक्रिया दिनुहोस
Copyright © 2019 / 2026 - Kalapanimedia.com All rights reserved
