उपत्यकामा आज खण्डित वर्षाको सम्भावना, अन्य भागमा कस्तो रहला मौसम?

काठमाडौँ। भारतमा रहेको मौसम प्रणाली कमजोर भएसँगै नेपालमा केही दिनदेखि जारी लगातारको वर्षा थामिए पनि मनसुनी वायु र पश्चिमी वायुको प्रभावका कारण धेरथोर वर्षाको क्रम भने जारी नै रहने भएको छ।

​जल तथा मौसम विज्ञान विभाग, मौसम पूर्वानुमान महाशाखाका अनुसार आज (सोमबार) दिउँसो तथा साँझको समयमा काठमाडौँ उपत्यकामा हल्कादेखि मध्यम वर्षाको सम्भावना रहेको छ। उपत्यकामा आज 'आइसोलेटेड' अर्थात् खण्डित वर्षा हुनेछ; जसको अर्थ उपत्यकाभित्रै पनि सबै ठाउँमा एकनासको पानी नपरी कुनै स्थानमा अलि बढी, कुनै स्थानमा कम वा कतै वर्षा नै नहुने हुनसक्छ।

वर्षा हुनुअघि काठमाडौँको आकाशमा आंशिकदेखि साधारणतया बदली रहनेछ। ​

अन्य प्रदेश र भू-भागको मौसमी अवस्था:

​हालको स्थिति: कर्णाली, सुदूरपश्चिम तथा अन्य प्रदेशका हिमाली भू-भागमा साधारणतया बदली रहेको छ भने पहाडी भेगमा आंशिक बदली छ। तराईका धेरैजसो स्थानमा भने मौसम मुख्यतया सफा रहेको छ। अहिले लुम्बिनी र सुदूरपश्चिमका एक-दुई स्थानमा हल्कादेखि मध्यम वर्षा भइरहेको छ।

​दिउँसोको मौसम: देशभर आंशिक बदली रहनेछ। देशका हिमाली तथा पहाडी भू-भागका थोरै स्थानहरूमा मेघगर्जन र चट्याङ्गसहित हल्कादेखि मध्यम वर्षा वा हिमपातको सम्भावना छ। ​

तराई क्षेत्र: सुदूरपश्चिम प्रदेशका तराईका थोरै स्थान तथा कोशी, मधेस, बागमती, गण्डकी र लुम्बिनी प्रदेशका तराई भू-भागका एक-दुई स्थानमा मेघगर्जन र चट्याङ्गसहित वर्षा हुनसक्ने महाशाखाले जनाएको छ। ​

मौसमविद्हरूका अनुसार हाल नेपालमा मनसुनी वायु, पश्चिमी वायुका साथै भारतको उत्तर प्रदेश आसपास रहेको न्यूनचापीय क्षेत्रको आंशिक प्रभाव कायमै छ।