फेसबुक टाइमलाइनमा नयाँ परिवर्तन: बीचमा प्रोफाइल तस्बिर र नामको पछाडि ‘डमी चेकमार्क’

के हो त यसको वास्तविक अर्थ ?

काठमाडौँ। पछिल्ला केही दिनयता सामाजिक सञ्जाल फेसबुकको प्रोफाइल टाइमलाइनको डिजाइनमा नयाँ परिवर्तन देखिएको छ।

पहिले बायाँपट्टि देखिने प्रयोगकर्ताको प्रोफाइल तस्बिर (प्रोफाइल पिक्चर) अहिले सरेर बीच भागमा आएको छ भने धेरैजसो प्रयोगकर्ताको नाम पछाडि ‘खैरो चेकमार्क’ (ग्रे टिक) समेत देखिन थालेको छ। ​टाइमलाइनमा एक्कासि देखिएको यस चेकमार्कले प्रयोगकर्ताहरूमाझ अन्योलता र चासो बढाएको छ।

धेरैले यसलाई मेटाको तर्फबाट उपलब्ध गराइएको आधिकारिक भेरिफिकेसन ब्याच ठाने पनि यो वास्तवमा फेसबुकले स्वतः दिएको आधिकारिक चेकमार्क भने होइन। ​फेसबुकले आफ्ना प्रयोगकर्ताहरूलाई सशुल्क सेवा ‘मेटा वन’ (Meta Subscription) लिन आकर्षित गर्ने उद्देश्यले नमुना (पूर्वावलोकन) का रूपमा यो ‘डमी’ चेकमार्क देखाएको हो। सशुल्क सब्स्क्रिप्सन खरिद गरेपछि यही चेकमार्क प्रोफाइलमा निलो रङ (ब्लु टिक) मा परिवर्तन हुन्छ भन्ने जानकारी दिन फेसबुकले यो डिजाइन पस्किएको हो।

​अहिले देखिएको यो खैरो चेकमार्क प्रयोगकर्ता स्वयमले आफ्नो टाइमलाइनमा बाहेक अरू कसैको प्रोफाइलमा देख्न सक्दैनन्। उक्त चेकमार्कमा क्लिक गर्दा ‘मेटा सब्स्क्रिप्सन’ एक्टिभ गर्ने विकल्प खुल्छ। ​हाल परीक्षणका क्रममा रहेको यो फिचर पूर्ण रूपमा कार्यान्वयनमा आएपछि विशेषगरी फेसबुक मार्केटप्लेस (सामान खरिद-बिक्री), फेसबुक डेटिङ र फेसबुक ग्रुपका च्याटहरूमा भेरिफिकेसन मार्कका रूपमा देखिनेछ। य

सले गर्दा अनलाइनमा लेनदेन गर्दा, च्याट गर्दा वा जोडिएका व्यक्तिहरू वास्तविक हुन् भन्ने पुष्टि गर्न प्रयोगकर्तालाई सहज हुने मेटाको विश्वास छ।