कंचनपुर । महाकालीको बाढीले दोधारा चाँदनी जोड्ने ऐतिहासिक झोलुङ्गे पुल भत्कियो, आवतजावत पूर्णरूपमा ठप्प कञ्चनपुर — महाकाली नदीमा आएको भीषण बाढीका कारण कञ्चनपुरको दोधारा चाँदनी नगरपालिका र भीमदत्त नगरपालिका (महेन्द्रनगर) जोड्ने प्रसिद्ध झोलुङ्गे पुल भत्किएको छ।
आज बिहान नदीको बीच भागमा रहेको पिलर भत्किएपछि पुलको केही भाग नदीमा खसेर बगेको प्रहरीले जनाएको छ। प्रहरीका अनुसार, दोधारा चाँदनीतर्फको तेस्रो स्पानमा क्षति पुग्दै सुरुमा ५–६ मिटर भाग माथि उठेको थियो। त्यसलगत्तै पिल्लर समेत ढलेपछि पुल भाँचिएर आवतजावत पूर्णरूपमा बन्द भएको हो।
करिब १ हजार ४५२ दशमलव ९६ मिटर लामो यो झोलुङ्गे पुललाई एसियाकै दोस्रो लामो झोलुङ्गे पुल मानिन्छ। दोधारा चाँदनीका बासिन्दाका लागि सदरमुकाम महेन्द्रनगर जोड्ने यो वर्षौँदेखिको मुख्य माध्यम रहँदै आएको थियो। हाल महाकाली नदीमा नयाँ पक्की पुल निर्माण भइसकेकाले प्रायः आवतजावत पक्की पुलबाटै हुने गरे तापनि, यो ऐतिहासिक झोलुङ्गे पुल आफैँमा जीर्ण बन्दै गएको अवस्थामा बाढीले क्षति पुर्याएको हो।
पुल चुँडिएपछि अहिले सो क्षेत्रको स्थानीय पैदल आवागमन पूर्णरूपमा प्रभावित भएको छ।
प्रतिक्रिया दिनुहोस
Copyright © 2019 / 2026 - Kalapanimedia.com All rights reserved
