उन्नति बोहरा 'शिला को' विशेष साहित्यिक साँझ आयोजना हुँदै

काठमाडौं। नेपाली साहित्य, गीत–संगीत र सामाजिक सेवाका क्षेत्रमा लामो समयदेखि सक्रिय वरिष्ठ साहित्यकार, गीतकार तथा पूर्वप्राज्ञ उन्नती बोहरा ‘शीला’को ६० वर्षे साहित्यिक यात्रा र ५४ वर्षे गीतलेखन यात्राको अवसरमा विशेष सांगीतिक कार्यक्रम आयोजना हुने भएको छ।

‘उन्नती बोहरा शीला गीत पुरस्कार मञ्च २०८३’ को आयोजनामा आगामी कात्तिक १५ गते काठमाडौंको भृकुटीमण्डपस्थित नेपाल पुलिस क्लबमा ‘फर्की आऊ शान्ति तिमी : उन्नती शीला गीत समर्पण साँझ’ आयोजना गर्न लागिएको हो। बोहराले सार्वजनिक गरेको निमन्त्रणाअनुसार कार्यक्रम दिउँसो १ बजेर १५ मिनेटमा हुनेछ। नेपाली साहित्य र संगीतको क्षेत्रमा आफ्नो जीवनका झन्डै छ दशक समर्पित गरेकी बोहरा गीतकार मात्र नभई कवि, उपन्यासकार, साहित्यिक अभियन्ता र समाजसेवीका रूपमा समेत परिचित छिन्। मानवीय संवेदना, प्रेम, पीडा, राष्ट्रियता, शान्ति र सामाजिक यथार्थ उनका सिर्जनाका प्रमुख विषय हुन्।

विसं २०२३ मा ‘आमा म हारेकी छैन’ शीर्षकको कविताबाट साहित्यिक यात्रा प्रारम्भ गरेकी उनले २०२९ सालमा ‘डाँडाकाँडा ढकमक्क ढाकी गुराँस मुस्कुराउँदा’ गीतमार्फत औपचारिक गीतलेखन यात्रा अघि बढाएको प्रकाशित विवरणमा उल्लेख छ। उनका ‘सिमलको फूल सरी’, ‘मेरो शून्य शून्य बानी’, ‘बदनाम हुन देऊ’, ‘खोला जस्तै बगिरहेछु’ र ‘धर्तीको सन्देश’ लगायतका गीत चर्चित छन्। विशेषगरी देश सशस्त्र द्वन्द्वको पीडाबाट गुज्रिरहेका बेला उनले सिर्जना गरेको ‘फर्की आऊ शान्ति तिमी’ गीत शान्ति, सद्भाव र मानवीय एकताको सन्देशका कारण स्मरणीय बनेको छ।

संगीतकार शम्भुजित बास्कोटाको संगीत र गायक कर्णदासको स्वरमा रहेको उक्त गीतलाई नै यसपटकको कार्यक्रमको मुख्य शीर्षक बनाइएको छ। उनका ‘कोसेली उसैलाई’, ‘भावनाका तरंग’, ‘अदृश्य घाउ’ जस्ता कृति तथा ‘सिक्काका दुई पाटा’ उपन्यास प्रकाशित छन्। उनका केही साहित्यिक सिर्जना अंग्रेजी भाषामा समेत अनुवाद भएका छन्। नेपाली गीतसाहित्यमा उनको योगदानबारे त्रिभुवन विश्वविद्यालयमा प्राज्ञिक अनुसन्धानसमेत भएको छ।

महिला गीतकार संघको संस्थापक अध्यक्षसमेत रहेकी बोहरा विभिन्न साहित्यिक तथा सामाजिक संघसंस्थामा सक्रिय रहँदै आएकी छन्। साहित्य र संगीतमा पुर्‍याएको योगदानका लागि उनले प्रबल गोरखा दक्षिणबाहुलगायतका सम्मान प्राप्त गरेकी छन्। हालै असोजमा उनलाई ‘गीत साहित्य रत्न सम्मान २०८३’ बाट पनि सम्मानित गरिएको थियो।

कार्यक्रमको निमन्त्रणा सार्वजनिक गर्दै बोहराले ६० वर्षे साहित्यिक र ५४ वर्षे गीतलेखन यात्राको यस मोडमा शुभेच्छुक, साहित्यकार, संगीतकर्मी तथा आफ्ना सिर्जनाप्रेमीहरूको साथ र माया विशेष रूपमा आवश्यक महसुस भएको बताएकी छन्। उनले पाठक, श्रोता र शुभचिन्तकहरूको माया, साथ र आशीर्वाद नै आफ्ना सिर्जनाका वास्तविक ऊर्जा भएको उल्लेख गर्दै सबैलाई कार्यक्रममा उपस्थित हुन हार्दिक निमन्त्रणा दिएकी छन्।

नेपाली साहित्य र संगीतमा निरन्तर योगदान दिँदै आएकी एक वरिष्ठ स्रष्टाको सिर्जनायात्रालाई सम्मान गर्ने अवसरका रूपमा हेरिएको यो सांगीतिक साँझले उनका कालजयी गीतहरूको पुनःस्मरण गराउनुका साथै नयाँ पुस्तालाई उनको साहित्यिक तथा सांगीतिक योगदानसँग परिचित गराउने अपेक्षा गरिएको छ।