रुपन्देही । नक्कली भुटानी शरणार्थी प्रकरणमा पुर्पक्षका लागि जेलजीवन बिताइरहेका पूर्वउपप्रधानमन्त्री टोपबहादुर रायमाझी कात्तिक २६ गते रिहा हुने भएका छन्।
६५ वर्ष उमेर पूरा भएका कारण रायमाझीले ज्येष्ठ नागरिकको सुविधा पाउन माग गर्दै अदालतमा निवेदन दिएका थिए। ज्येष्ठ नागरिकलाई तोकिएको कैद सजायमा २५ प्रतिशत छुट दिने कानूनी व्यवस्था अनुसार उनी छुट्न लागेका हुन्।
रायमाझीका निकटस्थ लिला केसीका अनुसार कात्तिक २५ गते नै रिहाको समय पुग्ने भए पनि कात्तिक २६ गते बिहान मात्रै उनी निस्कने तय भएको छ। "२५ गते नै रिहाको समय पुग्ने भए पनि २६ गते बिहान निस्कने कुरा भएको छ, त्यसपछि उच्च अदालतमा मुद्दा गएसँगै यसको किनारा लाग्छ," केसीले भने। उनका अनुसार अहिले रायमाझीको बिगो रकम समेत घटाएर १६ सय रुपैयाँ मात्रै बनाइएको छ।
६५ वर्षको उमेर हदका कारण सजाय छुट पाएर रिहा हुन लागेका भए पनि प्रचलित कानूनी व्यवस्था अनुसार रायमाझीले अब पुनः सांसदको चुनाव लड्न भने पाउने छैनन्।
यसअघि रायमाझीले अर्घाखाँचीबाट २०६४, २०७०, २०७४ र २०७९ का संसदीय निर्वाचनहरूमा लगातार चारपटक चुनाव जितेका थिए। उनी विभिन्न सरकारमा मन्त्री हुँदै उपप्रधानमन्त्रीसम्म बनेका थिए।
प्रतिक्रिया दिनुहोस
Copyright © 2019 / 2026 - Kalapanimedia.com All rights reserved
