ललितपुर । पत्रकारिता क्षेत्रमा कृत्रिम बौद्धिकता (एआई) को लहर बढेसँगै यसको व्यावहारिक र प्रभावकारी प्रयोग सिकाउन ललितपुरको जावलाखेलमा तीनदिने कार्यशाला सुरु भएको छ।
बागमती प्रदेश सञ्चार रजिस्ट्रारको कार्यालयले मङ्गलबारदेखि उक्त कार्यशाला सञ्चालनमा ल्याएको हो। कार्यशालाको उद्घाटन गर्दै सञ्चार रजिस्ट्रार रेवती सापकोटाले एआई पत्रकारको विकल्प नभएको बताए। यो केवल पत्रकारको कामलाई छिटो, सहज र प्रभावकारी बनाउने सहयोगी माध्यम मात्र भएको उनको भनाइ छ। पत्रकारितामा एआई प्रयोग गर्दा यसको उपयोगिता र सम्भावनासँगै सीमाबारे पनि स्पष्ट बुझ्नुपर्नेमा उनले जोड दिए।
सहभागी पत्रकारहरूले एआईबारे रहेका अन्योल र जिज्ञासा चिर्न यो प्रशिक्षण निकै उपयोगी हुने विश्वास लिएका छन्। तालिमबाट सिकेका ज्ञान र सीपलाई दैनिक पत्रकारिता अभ्यासमा उतार्नुपर्ने उनीहरूको धारणा छ।
तीन दिनसम्म चल्ने कार्यशालामा प्रशिक्षकद्वय अजय शर्मा र शिव पुरीले सहजीकरण गरिरहेका छन्। प्रशिक्षणमा एआईको सैद्धान्तिक पक्षसहित समाचार लेखन, सम्पादन र तथ्य जाँच (फ्याक्ट चेक) जस्ता काममा यसको व्यावहारिक प्रयोगबारे सिकाइने कार्यालयले जनाएको छ।

प्रतिक्रिया दिनुहोस
Copyright © 2019 / 2026 - Kalapanimedia.com All rights reserved